|
خلف المدى.. هونيك
عم بنطر حدا
عيونو نجوم مفتّحة، وصوتو صدى،
لابس تياب الرّيح...
تاكي عَ الجبال
شعرو ضباب مسرَّحو فوق الوِدا
مهَوشل عَ زيح الوقت،
عَ دروب المـُحال
يفتّش عَ حالو بالمسافة؟ وما اهتدى
يخطف الشّمس!
ويخفِيا بعبّ الزّوال،
وعن عين شرطي البدر...
وحدو ياخدا
خيّال!...
عَ حصان البلاغة والخَيَال
سيفو الحقيقة يسلّها...
يضيع السُّؤال،
يجلد الصّمت بكلمتو...
يجنّ المدى.
خلف المدى... هونيك
وحدي بِسمعو
ساكن الصّدفة، وغربتو
عم توجَعو
وكلما بِشيخ الهمّ بي بالو العتيق،
يسرّب عَ حالو...
وغير حالو ما معو...
بيزورني أوقات...
ما في لو دوام
وساعة بيِجي بالحلم...
ساعة بالصُّدَف
كَمشِة حنين مغلّفة شوَيّة كلام
ما بتعرفو محتاج،
أو غاوي تَرَف...
بيصير يحكي همس
عن ماضي مَرَق
بِقشع ظلام الغيب من بُكرا شَرَق
...لولا نزل عَ الجرح،
والهمّ اخترَق
بيطوف نهر الدّمع... ينده للغرَق
ولولا احترَق عَ بلاد...
تاريخا انسَرَق
بشعُر كأنّو الحلم بالبال احترَق
بسّ ان وِعي
بعيون... شمس ولاهِبة،
بيفيّق الإحساس، خمرة من الخِبي
بهرب معو، برجع صبي
إلبس عَـبَـايا مقصَّبة
إرسـم قوافـي مدهَّبة
تفتِّح كــروم الموهبة
تيصير عمري كتاب...
هيِّ المكتبة...
هيِّ الحبيبة العا ضلوعي
مسرَّبة!
هيك بيِجي الإلهام... فكرة مسرسَبة
بيغازلوها تنين:
مجنون ونبي
وبيروح؟ شقفة روح،
أو طيف ومَرَق...
تارك خْيَالو... حبر غافي عَ الورق
يا هالغريب!
لمين جايي تشتكي؟
متلك أنا بهالكون... محتار وغريب
عمري قَلَق وظنون خَوتا
...ملبَّكة
وبخيال عيني الباردة نار ولَهيب
ياما أنا ويَّاك... قفَّينا السَّهَر
كاسات!... خمر الليل ساعة ما يشيب
ياما بِسقف العتم
ضوَّينا القمر
قنديل يقشع هون نعجة،
وهون ديب...
دخلك تركني؟
لأ! خَوفي من الضّجر
يصحّر حياتي.. بعد ما إنتَ تغيب
حملني رسالة شَوق
بجوانح سفر
تا إدخل من الحلم عا بال الحبيب
كتبني صَلا نسّاك...
ترنيمة وَتَر
مَرمِغ شفافي عَ الجرح حتّى يطيب
خلقني بربيع الأرض،
أزهار وشجر
هبِّة نسيم العطر... ضحكة عندليب
وساعة ما تتعَب!
ردّني جَمِّع صُوَر
وكلما القصيدة تهزّني؟ أنطر حدا
عيونو نجوم مفتّحة، وصوتو صدى...
فتِّش عَليك بهالمدى؟
وشوفك قريب...
إنت الغريب العايش بشاعر غريب!
الياس زغيب |
